नेकपा (एमाले)बाट उप–मेयर बनेकी मीराकुमारी यादवले कीर्ते कागजात पेश गरी नेपाली नागरिकता लिएको आरोपमा पक्राउ परेकी छिन् ।
सप्तरीको डाकनेश्वरी नगरपालिकाकी उप–मेयर मीराकुमारीलाई प्रहरीले पक्राउ गरेको छ । बुधबार साँझ साढे ५ बजे प्रहरी कार्यालय पुगेकी मीराकुमारीलाई हिरासतमा राखिएको सप्तरीका प्रहरीले जानकारी दिएका छन् ।
उच्च अदालत जनकपुरको राजविराज इजलासले आइतबार प्रहरीलाई नागरिकता कसूरमा उप–मेयर मीराकुमारीविरुद्ध अनुसन्धान अघि बढाउन आदेश दिएको थियो ।
उप–मेयर मीराकुमारी र उनका पति महेन्द्र यादव भारतीय नागरिक रहेको खुलेको छ । उनीहरूले नक्कली प्रमाण खडा गरी नेपाली नागरिकता लिएको भन्दै डाकनेश्वरी नगरपालिका वडा नं. ४ का कृष्णकुमार यादव उजुरी लिएर प्रहरीकामा पुगेका थिए ।
प्रहरीले उजुरी नलिएपछि कृष्णकुमार यादवले उच्च अदालतमा उजुरी दिएका थिए । रिटमाथि सुनुवाइ गर्दै अदालतले प्रहरीलाई मुद्दा दर्ता गरी पक्राउ गर्न परमादेश जारी गरेको थियो ।
उप–मेयर मीराकुमारी यादवका पति महेन्द्र यादव भने फरार छन् । नागरिकता सम्बन्धी कसूरमा अनुसन्धान शुरु गरिएको एसपी कार्कीले बताएका छन् । उनको पतिको खोजविन भइरहेको छ ।
उप–मेयर मीराकुमारी यादव र उनका पति महेन्द्र यादव भारतको बिहार राज्यअन्तर्गत मझारी ग्राम, थाना निर्मली, पञ्चायत मझारी, अञ्चल निर्मली, जिल्ला सुपौलनिवासी रहेको दाबी उजुरीमा गरिएको छ ।
एमालेले मीराकुमारीलाई स्थानीय तहको निर्वाचनमा टिकट दिएको थियो । टिकट पाएपछि मीराकुमारी उप–मेयर पदमा निर्वाचित भएकी छिन् ।
कथित राष्ट्रवादीको नारा लगाउँदै आएको एमालेले भारतीय नागरिकलाई टिकट दिएर उप–मेयरमा जिताएको यो घटनाले छर्लङ्ग बनाएको छ ।
प्रतिकिर्या