नेपालगञ्ज (बाँके), १६ मङ्सिर : कृषि ज्ञान केन्द्रले किसानको खेतबारीमा कृषि प्राविधिकसहितको टोली पठाएर ‘कृषक प्राविधिक भेटघाट’ अभियान सुरु गरेको छ ।
लुम्बिनी प्रदेश सरकारको कृषि, भूमि व्यवस्था तथा सहकारी मन्त्रालयको स्वीकृत वार्षिक कार्यक्रमअनुसार कृषि ज्ञान केन्द्रमार्फत सो भेटघाट सुरु भएको हो । हालसम्म जिल्लाका डुडुवा गाउँपालिका–२, नरैनापुर गाउँपालिका–२ र ६ का किसानका खेतबारीमा पुगेर उनीहरूसँग छलफल तथा अन्तक्र्रिया गरिएको ज्ञान केन्द्रका प्रमुख विनोद घिमिरेले जानकारी दिनुभयो ।
सो कार्यक्रमबाट किसान उत्साहित र खुसी देखिएको उल्लेख गर्दै यसलाई कृषि अनुसन्धानसँग पनि जोड्न सकिने बताउनुभयो । “प्राविधिक रूपमा किसानका साना–साना समस्या देखिएका छन्, ती समस्या समाधान गर्न यसले सघाउ पुर्याउँछ”, प्रमुख घिमिरेले भन्नुभयो ।
प्रदेशमा पहिलोपटक प्रदेश सरकारको स्वीकृति वार्षिक कार्यक्रमअनुसार जिल्लाका किसानको खेतबारी र घरघरमा पुगेर उहाँहरूसँग भेटघाट, छलफल तथा अन्तक्र्रिया गरेको यो पहिलोपटक हो । अघिल्ला वर्षहरूमा किसानसँग जाने गरिए पनि औपचारिक रूपले प्रदेश सरकारले घोषणा गरेको कार्यक्रम यो पहिलो भएको बताइएको छ । बाँकेमा तीन स्थानका किसानसँग पुगेर समस्याका बारेमा जानकारी लिइएको छ ।
“स्थलगत रूपमा फिल्डमा नै पुगेर किसानसँग भेटघाट तथा छलफल गर्ने, समस्या पहिचान गर्ने र कार्यालयले समाधान गर्न सक्ने समस्या समाधान गरिदिने र जटिल खालका समस्या देखिएमा सुझावसहित कृषि अनुसन्धान केन्द्रमा पठाउने गरेका छौँ”, वरिष्ठ वागवानी विकास अधिकृत सन्तोष पाठकले भन्नुभयो ।
किसानका घरखेतमा पुगेर किसानसँग दोहोरो संवाद र छलफल हुँदा किसान पनि प्रोत्साहित हुने र आवश्यक जानकारी प्राविधिकसँग लिनसक्ने तथा किसानका समस्या कार्यालयले प्रत्यक्षरुपमा देख्न र बुझ्न सक्ने हुँदा त्यहाँबाट प्राप्त हुने विषयलाई आगामी योजना बनाएर कार्यान्वयन गर्न सजिलो हुनेछ ।
हालसम्म डुडुवा–२ कोलहीका किसान, नरैनापुर–२ स्थित चुरे बहुउद्देश्यीय कृषि सहकारी संस्थाका किसान र वडा नं ६ स्थित सन्तानेश्वर कृषि समूहका किसानसँग छलफल गरी किसानका समस्याका बारेमा जानकारी लिइएको छ । यसलाई अन्य स्थानीय तहमा पनि विस्तार गरिने कृषि ज्ञान केन्द्रले जनाएको छ ।
प्रतिकिर्या