जलहरीको करिब १० केजी सुन गायब भएको पुष्टि

पशुपतिनाथ मन्दिरमा राखिएको सुनको जलहरिको तौल १०७ किलो ४७ ग्राम पुष्टि भएको छ ।

अख्तियार दुरूपयोग अनुसन्धान आयोगले जलहरीको तौल लिएको हो । आइतबार अख्तियारले भक्तजनलाई मन्दिर प्रवेशमा रोक लगाइएको थियो भने सुरक्षाका लागि नेपाली सेना तैनाथ गरिएको थियो । सुन जोख्ने समयमा गुणस्तर तथा नापतौल विभाग, पुरातत्व विभागका अधिकारी र सुनचाँदी व्यवसायी महासंघका प्रतिनिधिसमेत पशुपति पुगेका थिए ।

पशुपतिमा जलहरि राख्न नेपाल राष्ट्र बैंकबाट १०३ किलो ७९३ ग्राम सुन खरिद गरिएको थियो । यस्तै २ किलो ८ सय ८८ ग्राम तामा, १ किलो २ सय ५३ ग्राम चाँदी र १२ ग्राम ७५ मिलिग्राम जिन्क राखिएको थियो ।

यस्तै १० किलो ९ सय ७६ ग्रामको रिङ हालिएको थियो । महालेखा परीक्षकको प्रतिवेदनले रिङ बनाउने काममा प्रयोग भएको सुनको परिमाणमा कैफियत देखिएको उल्लेख गरेको थियो । सबै गर्दा करिब १० केजी जति सुन हराएको देखिएको छ । जलहरीमा राख्न किनिएको ९ केजी सुन हराएको भन्दै प्रतिनिधिसभामा माओवादी सांसद लेखनाथ दाहालले प्रश्न उठाएका थिए ।

दाहालको अभिव्यक्तिमा प्रमुख प्रतिपक्षी एमालेले प्रश्न उठाउँदै संसदको रेकर्डबाट हटाउन दबाब दिएको थियो । दाहालको अभिव्यक्ति रेहर्डबाट नहटाइए बजेट अधिवेशन चल्न नदिने एमालेको चेतावनीपछि सत्तापक्ष उनको अभिव्यक्ति हटाउन तयार भएको थियो ।

सोमबार मात्र प्रतिनिधिसभा बैठकमा बोल्दै काँग्रेस सांसद् प्रदीप पौडेलले जलहरी प्रकरणमा दाहालले बोलेका विषय रेकर्डबाट हटाइनु गल्ती भएको भन्दै उक्त प्रकरण छानबिनका लागि संसदीय समिति गठनको माग गरेका थिए