साफ च्याम्पियनसिप २०२३ ले जुराएको यो यस्तो खेल हुनेछ, जसले प्रतियोगितामा नेपालको भाग्य कोर्ने छ । प्रशिक्षक भिन्सेन्जो अल्बर्टो एनिसले ठीकै भनेका छन्, यो ‘फाइनल’ जस्तै खेल हो ।
आफूअनुकूल नतिजा निकाल्ने हो भने मात्र नेपालले अन्तिम खेलमा पाकिस्तानको सामना गर्दा त्यसको कुनै अर्थ रहनेछ । समूह ‘ए’ मा डिफेन्डिङ च्याम्पियन भारत र आमन्त्रित कुवेत समान ३ अंक बटुल्दै शीर्ष दुई स्थानमा छन् ।
शनिबारको पहिलो खेलमा कुवेतले पाकिस्तानको सामना गर्नेछ । त्यसपछि नेपाल भारतसँग भिड्ने छ । कुवेतले पाकिस्तानविरुद्धको खेलमा कस्तो नतिजा निकाल्ने हो, त्यसको कुनै न कुनै प्रभाव साँझ हुने खेलमा पर्नेछ । प्रचलित भाषामा भन्दा नेपालको स्थिति ‘गर या मर’ जस्तै छ ।
अञ्जन कीर्तिमान नजिक
नेपालले भारतको सामना गर्दाका एक प्रमुख खेलाडी अञ्जन विष्ट रहनेछन् । अझ नेपालले सबैभन्दा विश्वास गर्ने खेलाडी भन्नु नै उनी नै हुन् । कुवेतविरुद्ध उनले गरेको गोल १२ औं रह्यो । उनी नेपालका लागि सर्वाधिक गोल गर्ने खेलाडी सूचीमा दोस्रो स्थानमा छन् । उनले भन्दा बढी गोल दुई खेलाडीमा हरि खड्का र नीराजन रायमाझी छन् । उनीहरू दुवैले समान १३ गोल गरेका छन् । नेपालले यसपल्टको साफ च्याम्पियनसिपमा दुई खेल खेल्न बाँकी छ ।
प्रतिकिर्या