एसिया कप नेपालले भारतसँग श्रीलंकामा खेल्ने !

एसिया कप २०२३ र एकदिवसीय विश्वकप क्रिकेटलाई लिएर भारत र पाकिस्तान क्रिकेट बोर्डबीचको विवाद समाधान हुने अवस्थामा पुगेकाे बताइएको छ । यी दुई प्रतियोगिताको सन्दर्भमा दुई देश प्रत्यक्ष आमनेसामने भएनन् तर एसीसी र आइसीसीका प्रतियोगिताहरू यी दुई देशबीचको तनाव कम गर्ने भूमिकामा देखिएका छन् ।

हालसम्म दुवै प्रतियोगितामा पाकिस्तानको सहभागिताबारे केही स्पष्ट छैन तर भारतीय सञ्चारमाध्यमहरूका अनुसार यो समस्या समाधान हुने बाटोमा छ ।

बीसीसीआई सचिव जय शाहको नेतृत्वमा रहेको एसियाली क्रिकेट काउन्सिलले एसिया कपका लागि पीसीबीको हाइब्रिड मोडललाई अनुमोदन गर्ने सम्भावना छ। यस्तो अवस्थामा पाकिस्तानसहित अन्य टोलीले आफ्नो खेल पाकिस्तानमै खेल्नेछन् । त्यस्तै, भारतीय टोलीका खेलहरू श्रीलंकाको गाले र पल्लेकेले मैदानमा हुनेछन्। योसँगै पीसीबीले भारतमा आयोजना हुने एकदिवसीय विश्वकपमा आफ्नो टोली पठाउने सहमति गरेको छ ।

एसीसीले मंगलबार एसिया कप आयोजनाको औपचारिक घोषणा गर्न सक्नेछ । हाइब्रिड मोडलको आधिकारिक स्वीकृतिले पाकिस्तानी टोलीलाई अक्टोबर-नोभेम्बरमा हुने एकदिवसीय विश्वकपका लागि भारत भ्रमण गर्ने बाटो खुला गर्नेछ। पाकिस्तानी टोली अहमदाबादमा पनि खेल्न तयार छ ।

एसिया कप आयोजनाको समस्या समाधान गर्ने जिम्मा एसीसी कार्यकारी बोर्डका सदस्यलाई दिइएको छ । ती सदस्यमा ओमान क्रिकेट बोर्डका प्रमुख पंकज खिम्जी पनि थिए । धेरै देशहरूले हाइब्रिड मोडेल चाहँदैनन्। तर, अहिलेसम्म लाहोरको गद्दाफी स्टेडियममा चार खेल हुनेछन्, जसमा भारतीय टोलीले खेल्ने छैन । यी खेलहरू हुन्– पाकिस्तान विरुद्ध नेपाल, बंगलादेश विरुद्ध अफगानिस्तान, अफगानिस्तान विरुद्ध श्रीलंका र श्रीलंका विरुद्ध बंगलादेशका हुने छन् ।

‘भारत र पाकिस्तानबीचका दुई खेल र सुपर फोरका अन्य सबै खेल पल्लेकेले वा गालेमा हुनेछन्,’ एसीसी बोर्डका एक सदस्यले नाम न छाप्ने सर्तमा  भारतीय मिडियालाई भने। एसिया कप सेप्टेम्बरमा हुने अपेक्षा गरिएको छ ।

मिडिया रिपोर्टका अनुसार जब आईसीसीका सीईओ जियोफ एलार्डिस र अध्यक्ष ग्रेग बार्कले पीसीबी अध्यक्ष नजम सेठीलाई भेट्न कराँची गएका थिए, पाकिस्तानले भारतमा हुने विश्वकप खेल्न कुनै शर्त नराख्ने निर्णय गरेको थियो। एसिया कप पाकिस्तानमा हुँदैछ । किनभने, यो प्रतियोगिता आयोजना गर्ने अधिकार पीसीबीसँग छ।

एसिया कपमा नेपाल भारत र पाकिस्तानको  समूहमा रहेको छ । नेपालले भारतसँगको खेल श्रीलंकामा गएर खेल्दा पाकिस्तानसँगकाे खेल खेल्न पाकिस्तानको भ्रमण गर्नु पर्ने हुन सक्छ ।

एसिया कपमा पाकिस्तान र भारतबीच दुई खेल हुने तय भएको छ भने दुवै टोली फाइनलमा पुगे तेस्रो खेल हुनेछ । यी दुई देशबीचको खेलले प्रशारणकर्तालाई मनग्य आम्दानी गर्छ र यदि पाकिस्तानले खेलेको छैन भने एसिया कपको मिडिया अधिकारको लागत आधा हुने थियो र यसले एसीसीलाई ठूलो नोक्सान हुने थियो।