आर्थिक वर्ष २०८०/८१ को बजेटमा सरकारले खेल पूर्वाधार निर्माणका क्रममा क्रिकेटलाई विशेष महत्व दिएको छ । क्रिकेट पूर्वाधारका लागि ४४ करोड ११ लाख रुपैयाँ विनियोजन गरिएको छ ।
सबैभन्दा धेरै कीर्तिपूर मैदानलाई स्तरोन्नती गरेर फ्लर्ड लाइट जडानका लागि २० करोड विनियोजन गरेको छ । नेपालमा २ वटा अन्तर्राष्ट्रिय मान्यता प्राप्त क्रिकेट मैदान भए पनि पूर्वाधार अभावका कारण डे नाइट गेम हुन सकिरहेको छैन ।
नेपाल अहिले एक दिवसीय मान्यता जोगाउँदै विश्वकप ग्लोबल क्वालीफायर खेल्दै छ भने एसियाकपमा समेत स्थान बनाएकाले सरकारले पनि क्रिकेटमा विशेष ध्यान दिएको छ । प्रधानमन्त्री पुष्पकमल दाहाल प्रचण्डले कीर्तिपुर मैदानमा फलर्ड लाइट जडानका लागि आफ्नो पूरा सहयोग हुने बताएका थिए । अहिलेको बजेटमा पनि उक्त कार्यका लागि २० करोड बजेट विनियोजन गरिएको छ ।
आर्थिक वर्ष भित्र प्रक्रिया अघि बढाएर फलर्ड लाइट जडान गर्ने लक्ष्य लिइएको छ । यसैगरी कीर्तिपुरमा फलर्ड लाइट र स्कोरबोर्डका जडानका लागि यो रकम खर्च गरिने छ । यसैगरी कीर्तिपुर क्रिकेट मैदान प्राटिक्स नेट मर्मत सम्भारका लागि थप २० लाख रुपैयाँ विनियोजन गरेको छ ।
यसैगरी क्रिकेट पूर्वाधारमा मूलपानीका लागि १५ करोड विनियोजन हुँदा पोखरा क्रिकेट स्टेडियमका लागि १ करोड ५० लाख विनियोजन भएको छ । गौतमबुद्ध अन्तर्राष्ट्रिय क्रिकेट रंगशाला निर्माणका लागि १ लाख विनियोजन हुँदा भैरहवा क्रिकेट रंगशाला निर्माणका लागि ४० लाख रुपैयाँ विनियोजन भएको छ । कोहलपुर क्रिकेट रंगशाला तथा महिला क्रिकेट एकेडेमी निर्माण कोहलपुरलाई २ करोड विनियोजन हुँदा गिरिजाबाबु क्रिकेट रंगशाला विराटनगरलाई सरकारले ३ करोड बजेट छुट्याएको छ ।
यस्तै धनगढी फाप्लामा अन्तर्राष्ट्रिय क्रिकेट मैदान तथा खेलग्रामको डीपीआर बनाउनका लागि १ करोड विनियोजन गरिएको छ । त्यसैगरी सुवर्ण शमसेर क्रिकेट रंगशाला पूर्वाधार निर्माण बुढानिलकण्ठका लागि सरकारले ५० लाख विनियोजन गर्दा क्रिकेट रंगशाला पूर्वधार निर्माण वैतडीका लागि ५० लाख विनियोजन गरिएको छ ।
प्रतिकिर्या