जनार्दनको कमाण्डमा रुकुममा तीन ३१६८ अस्थायी टहरा निर्माण

काठमाडौँ । माओवादी रूपान्तर अभियानको कमाण्डिङ गर्दै बागमती प्रदेशको गाउँबस्तीमा सक्रिय रहेका पूर्वअर्थमन्त्री एवं माओवादी केन्द्रका उपमहासचिव जनार्दन शर्मा कात्तिक १७ राति गएको विनासकारी भूकम्पको कारण निकै मर्माहित भए । जाजरकोटको बारेकोट गाउँपालिकास्थित रामीडाँडा केन्द्रबिन्दु भएर ६.४ म्याग्निच्युडको भूकम्पले जाजरकोटसहित शर्माको गृहजिल्ला रुकुम(पश्चिम)मा समेत जनधनको ठूलो क्षति भयो । भूकम्पमा परी जाजरकोटमा १०१ जनाको ज्यान गयो भने रुकुम(पश्चिम)मा ५२ जनाले ज्यान गुमाए । सयौँ घाइते भएका छन् । 

यी दुई जिल्लामा करिब ९० प्रतिशत घर तथा सार्वजनिक भौतिक संरचना पूर्ण क्षति भएको गृह मन्त्रालयको तथ्याङले देखाएको छ । भू–कम्पपछि भोलिपल्ट झिसमिसे बिहानमै पीडित जनताको उद्धार, राहतका लागि प्रधानमन्त्री पुष्पकमल दाहाल प्रचण्डसहित शर्मा प्रभावित क्षेत्र पुगे । तत्काल उद्धारको काम सम्पन्न गरी प्रधानमन्त्री प्रचण्ड काठमाडौँ फर्किए । शर्मा गृहजिल्ला रुकुम(पश्चिम)का पीडित जनताको उद्धार, राहत र पुनर्निर्माण सक्रिय रहे । 

एक महिनादेखि रुकुमेली जनताको घर आगमनमा खटिएका शर्माले बढ्दै गएको चिसोबाट पीडितलाई बचाउन सिंगो जिल्ला कमिटीलाई स्वयंसेवक दस्तामा रुपान्तरण गरे । आफ्नै नेतृत्वमा तीन हजारभन्दा बढी स्वयंसेवक बनाएका उनी अस्थायी न्यानो टहरा बनाउन दिनरात खटिएका छन् । 

रुकुम(पश्चिम)मा मुसीकोट, चौरजहारी, आठबिसकोट नगरपालिका रहेका छन् । यस्तै बाफिकोट, त्रिवेणी र सानीभेरी गाउँपालिका रहेका छन् । यी पालिकामा अहिलेसम्म तीन हजार १६८ घरटहरा बनिसकेको शर्माले बताए । उनका अनुसार आठबिसकोट नगरपालिकामा एक हजार ३०५, सानीभेरी गाउँपालिकामा ८५४, चौरजहारी नगरपालिकामा ६०७, मुसिकोट नगरपालिकामा २४, त्रिवेणी गाउँपालिकामा ३०७ र बाफिकोट गाउँपालिकामा ७१ अस्थायी टहरा निर्माण भएको छ । माओवादी जिल्ला कमिटीले उपलब्ध गराएको तथ्याङक अनुसार रुकुम(पश्चिम)मा ३२ हजार ३०७ घर क्षति भएका छन् । जसमध्ये मुचुल्का तयार भएको २४ हजार ४२३ रहेका छन् भने ६ हजार ९९६ जना परिवारले अस्थायी टहरा निर्माणका लागि पहिलो किस्ता पाएका छन् । 

आठबिसकोट नगरपालिकामा ९ हजार ६६३ घर भत्किएकामध्ये ७ हजार २५० को मुचुल्का तयार भएको छ । यहाँ २ हजार ७३० परिवारले पहिलो किस्ता पाएका छन् । यस्तै सानीभेरी गाउँपालिकामा ५ हजार ७४३, चौरजहारी नगरपालिकामा ७ हजार ५, मुसिकोट नगरपालिकामा ३ हजार ९९९, त्रिवेणी गाउँपालिकामा ४ हजार ६६४ र बाफिकोट गाउँपालिकामा एक हजार ७५३ घर भत्किएका छन् । तीमध्ये सानीभेरीमा ५ हजार ३७३, चौरजहारीमा ६ हजार १४२, मुसीकोटमा एक हजार ८२६, त्रिवेणीमा २ हजार ७९ र बाफिकोटमा एक हजार ७५३ घरको मुचुल्का तयार भएको छ । यसैगरी पहिलो किस्ता पाउनेमा सानीभेरीमा एक हजार ६९९, चौरजहारीमा एक हजार ४४३ र त्रिवेणीमा एक हजार १२४ परिवारले पहिलो किस्ता पाएका छन् ।