काठमाडौँ । पुर्व प्रधानमन्त्री डा. बाबुराम भट्टराईले निजामति कर्मचारी विधेयकमा भएको जालसाजी विश्व इतिहासकै निकृष्ट र लाजमर्दोमध्ये राजनीतिक ठगीको घटना भएको टिप्पणी छन् ।
सामाजिक सञ्जालमा टिप्पणी गर्दै डा. भट्टराईले निजामती कर्मचारी सम्बन्धि विधेयकमा भएको परिवर्तनको घटना बारे टिप्पणी गर्दै उच्च तहको कर्मचारी र राजनीतिक नेतृत्वको साँठगाँठमा यो देशमा कति ठूला राज्यदोहनकारी, राष्ट्रघाती र जनविरोधी अपराधहरू हुँदै आएका रहेछन् वा हुनसक्ने रहेछन् भन्ने यो जिउँदो र ताजा प्रमाण भएको उल्लेख गरेका छन् ।
उनले अब टालटुले सुधारले नहुने बताउदै समग्र राजनीति र राज्यप्रणालीकै अग्रगामी, लोकतान्त्रिक, समाजवादी पुनर्संरचना गर्नुपर्ने बताएका छन् ।
उनले भनेका छन्-
'कूलिंग अफ पिरियड' भनिने सरकारी कर्मचारीहरूले अवकाश वा राजीनामा पछि अर्को ठूलो सरकारी भाग खान २ बर्ष पर्खनुपर्ने संसदीय समितिले पारित गरेको प्रावधान जालसाजीपूर्ण ढंगले हटाएर संसदबाट पारित गराएको घटना नेपाल मात्र हैन विश्व इतिहासकै निकृष्ट र लाजमर्दोमध्ये एक राजनीतिक ठगीको घटना हुनुपर्छ !
उच्च तहको कर्मचारी र राजनीतिक नेतृत्वको साँठगाँठमा यो देशमा कति ठूला राज्यदोहनकारी, राष्ट्रघाती र जनविरोधी अपराधहरू हुँदै आएका रहेछन् वा हुनसक्नेरहेछन् भन्ने यो जिउँदो र ताजा प्रमाण हो । यसको जति भर्त्सना र निन्दा गरे पनि कम हुन्छ ।
हामीले त्यत्तिकै अब टालटुले सुधारले हुन्न बरू देशको समग्र राजनीति र राज्यप्रणालीकै अग्रगामी, लोकतान्त्रिक, समाजवादी पुनर्संरचना गरौं भनेर केही बर्षदेखि नयाँ वैकल्पिक राजनीतिवारे चिच्याउँदै आएको हैन है !!
प्रतिकिर्या