बैंकको ऋण तिर्न नसकेपछि टल बहादुर ले राखे आफ्नो मृगौला विक्रीमा

काठमाडौं । पछिल्लो समय नेपालमा बैंक तथा वित्तिय संस्थाको आतंक छ । ब्याजदर आकाशिएको छ । मध्यम वर्गका जनता बैंक ब्याज तिर्नै नसकेर थलिएका छन् । तर, सरकारले एकल अंकमा ब्याजदर कायम गर्न सकेको छैन । यस्तो स्थितिमा सर्वसाधरण भने अब आफ्नै शरिरका अंग बेचेर भए पनि ऋणको ब्याज तिर्ने संगिन मोडमा पुगेका छन् ।
‘मेरो किड्नी बिकाउमा छ कसैलाई चाहिन्छ भनी सम्पर्क गर्नुहोला मलाई बेभार चलाउन धेरै गरो भएको हुनाले म किड्नी बेच्न खोजेको हो । नेपाल सरकारसँग ष्पष्नि मेरो अनुरोध नरोक्नका लागि ।’ सामाजिक सञ्जाल मार्फत सार्वजनिक भएको यो पोस्टरमा सम्पर्क नम्बर उल्लेख छ ।

उनले आफ्नो नम्बर ९८०३३२७०८४ रहेको उल्लेख गरेका छन् । ब्लड ग्रुप पनि ए भएको उल्लेख छ । उनै व्यक्तिको नम्बरमा फोन गर्दा उनी नवलपरासी घर भएका ३८ वर्षिय टल बहादुर परियार भएको खुल्यो । उनले आफूले बैंक ऋण मार्फत एउटा हात्ती गाडी किनेको र उक्त गाडीको किस्ता तिर्न नसक्दा किस्ता तिर्नकै लागि मृगौला विक्रीमा राखेको बताए ।

‘२ वटा छोरा छोरी छन् । उनीहरुलाई पाल्न पर्यो । बैंक ऋण गरेर हात्ती गाडी किनेको थिएँ । त्यो गाडी पनि बुढीले स्वरुममा लगेर कौडीको भाउमा बेचिदिइन् । अहिले श्रीमती पनि कुवेत गएको चार महिना भयो कुनै फोन सम्पर्क छैन,’ उनले दियोपोस्टसँग भने,‘अब मैले मृगौला बेच्नुको विकल्प छैन । खेती किसानी गर्न हाम्रो जमिन छैन । नवलपरासीमा हामी सुकुम्बासी बस्तीमा छौँ । छोरा छोरीलाई खानेकुरा छैन ।’

उनले उक्त पोस्टर राखेपछि प्रहरीले उनलाई बोलाएर बयान लिएको छ । नवलपरासी प्रहरीले उक्त पोस्टर हटाउन दबाव दिएको उनले बताए ।