उदयमान कवि प्रचण्ड भाष्कर कलौनी (गुणाकर) को २९ वर्षको उमेरमा निधन भएको छ । विगत एक वर्षदेखि घाँटीको क्यान्सर रोगबाट ग्रसित कवि प्रचण्ड भाष्करको गएराति ०२ः४० बजेको समयमा भीमदत्त नगरपालिका वडा नम्बर १७ मझगाँउस्थित आफ्नै निवासमा निधन भएको पारिवारिक श्रोतले जनाएको छ । क्यान्सरबाट ग्रसित भएपछि उनको काठमाडौँ र भारतको दिल्ली सहित विभिन्न ठाउँका अस्पतालमा उपचार गरिएको थियो । केही समय अगाडि मात्रै उनको किमो थेरापी गरिएको थियो । उनको उपचारका लागि आर्थिक समस्या नहोस् भनेर विभिन्न क्षेत्रबाट स्वतःस्फूर्त रूपमा आर्थिक सहयोग समेत सङ्कलन भइरहेको थियो ।
२०५१ सालमा बैतडीको शिवनाथ गाउँपालिका वडा नम्बर २ शर्मालीमा जन्मिएका प्रचण्ड भाष्करले माध्यमिक तहसम्मको शिक्षा नागार्जुन माध्यमिक विद्यालय शर्माली बैतडीबाट आर्जन गरी उच्च शिक्षाका लागि कञ्चनपुर आएका थिए । छोटो समयमै डोट्याली र नेपाली भाषाका कविता लेखी विभिन्न मञ्चमा वाचन गर्ने कला भएका प्रचण्ड भाष्करको निधनले परिवारजन मात्रै नभई उनका आफन्तजन, इष्टमित्र, छरछिमेकी, साथीभाइहरू, साहित्यप्रेमी र उनका शुभचिन्तकहरू शोकमा परेका छन् । प्रचण्ड भाष्करको पार्थिव शरीरलाई अहिले महाकाली आर्यघाटमा दाहसंस्कार गर्न लागिएको उनका आफन्त प्रकाश कलौनीले बताएका छन् ।
प्रतिकिर्या