प्रधानन्यायाधीश राउतले पूर्वराजा ज्ञानेन्द्रलाई किन भेटे ?

काठमाडौं, ८ वैशाख । प्रधानन्यायाधीश प्रकाशमानसिंह राउत राजनीतिक पृष्ठभूमिबाट आएका हुन् । उनमा पछिल्लो समय राजनीतिक महत्वकांक्षा बढ्दै गएको निकट स्रोतले बताएका छन् । राउत खिलराज रेग्मी शैलीमा सरकारको नेतृत्व गर्ने ग्रान् डडिजाइनमा जोडिन थालेका छन् । यसका लागि उनले सबै शक्ति प्रयोग गर्न थालेका छन् ।

राउतले पूर्वराजा ज्ञानेन्द्र शाहसँग गोप्य भेट गरेको विश्वस्त स्रोतले बताएको छ । शाहसँगको भेट ठूलै योजनामा भएको बुझिएको छ । हालै भएको भारत भ्रमणको बेला राजाको विशेष दूतसंग राउतको अति गोप्य भेट भएको बुझिएको छ । भ्रमणको बेला साथमा रहेका विश्वासपात्रले पनी यो भेट गोप्य राखेका छन्।

राजनीतिक अस्थिरता ल्याउने गरी गतिविधि बढिरहँदा शाहसँग राउतको भेट भएको हो । पूर्वप्रधानन्यायाधीश कल्याण श्रेष्ठले पनि शाहसँग पटक पटक भेटिसकेका छन् । उनकै योजना अनुसार राउतसँग पनि भेट भएको बुझिएको छ ।

श्रेष्ठ संवैधानिक निकायमा भएका ५२ जनाको नियुक्ति बदर गर्ने डिजाइनमा लागिरहेका छन् । यो नियुक्ति बदर भएसँगै काँग्रेस र एमालेबीचको गठबन्धन टुट्ने र नयाँ राजनीतिक अस्थिरता निम्तने अवस्था बन्ने बुझाई योजनाकारहरुको रहेको छ । यसैका लागि राउतलाई श्रेष्ठले उकासेका छन् । अहिले संवैधानिक निकायको नियुक्तिको सुनुवाई निरन्तर चलाइएको छ र अन्तिम फैसला नआउञ्जेलक सुनुवाई चल्ने गरी बढाइएको छ । फैसला नियुक्तिको विपक्षमा आउने गरी घटनाक्रम बढिसकेको छ ।

राउतको पछिल्लो कदम राजनीतिक अस्थिरताबीच अन्तरिम सरकारको अध्यक्षता गर्ने गरी बढिरहेको सर्वोच्च अदालतको विश्वस्त स्रोतले बताएको छ । उनले निकटस्थलाई ठूलै राजकीय जिम्मेवारी आउन लागेको र त्यसका लागि तयार रहन भन्ने गरेको बुझिएको छ । त्यो भनेको खिलराज रेग्मीकै जस्तो जिम्मेवारी भन्न खोजिएको बुझाई अदालतभित्र उनका भित्रियाको रहेको छ ।

वर्तमान संविधानमा सुधार गर्ने भन्दा अर्को संविधान ड्राफ्टको योजना पनि भित्र भित्र बनिरहेको छ । यसमा राउतलाई वरिष्ठ अधिवक्ता डा. सुरेन्द्र भण्डारी र अरुण पौडेलले साथ दिइरहेका छन् । भण्डारी राजावादी कानून व्यवसायी हुन् भने पौडेलको निकटता काँग्रेस उपसभापति पूर्णबहादुर खड्कासँग छ । पौडेललाई चाँडै न्यायाधीश नियुक्तिको तयारी पनि चलिरहेको छ । न्यायाधीश हुनु अघि राउत र पौडेल एउटै ल फर्म दियाद ल फममा संगै काम गर्थे । राउतले वरिष्ठ अधिवक्ता दिंदा जुनियर कानून व्यवसायी पौडेललाई लाभान्वित गराउन अन्तिमको १५९ नं मा पौडेलको नाम जबरजस्ती घुसाएका थिए ।

राउतको पछिल्लो सक्रियता र गतिविधिबारे सुरक्षा निकायले नियमन गरिरहेको विश्वस्त स्रोतले बताएको छ । उनले पूर्वराजा ज्ञानेन्द्र शाहसँग गोप्य भेट गरेको सूचना प्रधानमन्त्री केपी शर्मा ओली र काँग्रेस सभापति शेरबहादुर देउवासम्म पुगेको छ । यही कारण देउवाले राजा फर्काउन बाह्य शक्ति पनि लागेको हो या होइन बुझ्न लगाएका थिए । देउवाको हालैमात्र भारतका लागि राजदूत डा। शंकर शर्माले योगी आदित्यनाथसँग भेटेर राजा फर्काउन खोजेको हो या होइन बुझ्न लगाएको विषय बाहिरिइसकेको छ ।

५२ जनाको नियुक्ति बदरको चर्चा बजारसम्म चलाइएको छ । रिक्त पदहरुमा आफ्ना मान्छे नियुक्त गर्नेसम्मको योजनामा अस्थिरतामा लाभ लिन खोज्ने समूह लागिसकेका छन् । कतिपय पदहरु अहिले नै अघोषित रुपमा बाँड्न थालिएको छ ।

सर्वोच्च अदालतभित्र ठूलै तरंग आउने गरी भित्र भित्र केही तयारीहरु भइरहेको आशंका गरेका न्यायाधीशहरु पनि झस्किएका छन् । त्यसो त अदालतमा भविष्यमा बन्ने प्रधानन्यायाधीशहरुको टुंगो लागिसकेको छ । सपना मल्ल प्रधान साँढे २ वर्ष, कुमार रेग्मी डेढ वर्ष अनि हरि फुयाँलले ४ वर्ष प्रधानन्यायाधीश बन्ने रोलक्रम छ । तर, ठूलै उथलपुथलको योजनाको भेउ पाएर न्यायाधीशहरु राउतसँग डराउन थालेको स्रोतले बतायो ।

राउत नेपाली काँग्रेस पृष्ठभूमिका हुन् । तर, शक्तिशाली पदमा पुगेपछि उनले धेरैलाई चक्मा दिन थालेका छन् । देउवा पनि राउतबाट ठूलै धक्का पर्नसक्ने भयमा रहेको बुझिएको छ । संवैधानिक नियुक्ति बदर आएमा राजनीतिक शक्तिसंघर्ष अर्को मोडमा पर्ने निश्चित छ । काँग्रेस र एमालेको गठबन्धन टुट्ने सम्भावना रहन्छ । राजावादी सक्रिय भएको अवस्थामा हुने शक्तिसंघर्षले राउत खिलराजको अर्को स्वरुपमा परिणत हुने अवस्था आउनसक्छ । अन्तरिम सरकारको नेतृत्वको दाउमा कल्याण श्रेष्ठ पनि छन् । तर, ग्रान्डडिजाइन बनाउनेहरुले भित्र भित्र बहालवाला प्रधानन्यायाधीशलाई नै बढाउने सुझाव दिएबाट त्यसै अनुसारको रणनीति बढिरहेको छ ।-nepali pen