‘सुनिएको शरीर लिएर महेन्द्र विद्यालय पुग्छन्’

बलेवा (बागलुङ), २३ मङ्सिरः जिल्लाको निसीखोला गाउँपालिका–६ स्थित जनकल्याण माध्यमिक विद्यालयमा अध्ययनरत २० वर्षीय महेन्द्र विक अहिले दुखेको र सुनिएको शरीर लिएर विद्यालय आउने गर्नुहुन्छ । आर्थिक अवस्था कमजोर भएकाले उपचारबाट बञ्चित उहाँ पढ्ने रहर पूरा गर्न सुनिएको शरीर लिएर विद्यालय पुग्नुहुन्छ ।

जन्मेको तीन महिनामा उहाँ बिरामी पर्नुभयो । शरीरमा साना गिर्खा देखिए पनि आर्थिक अवस्था कमजोर भएकाले परिवारले उपचार नगराएका विक बताउनुहुन्छ । विस्तारै उहाँको शरीरका गिर्खा बढ्दै गए । घाँटी, पेट, छाती, खुट्टा र हातमासमेत गिर्खा बढ्दै गएपछि असहज बन्दै गएको उहाँ बताउनुहुन्छ ।

विक अहिले कक्षा ६ मा पढ्नुहुन्छ । शरीरका गिर्खा बढ्दै गएपछि शरीर दुख्न र सुनिन थालेको भन्दै आर्थिक अवस्था कमजोर भएकाले उपचारका लागि जान नसकेको बताउनुहुन्छ । गाउँमा सञ्चालित स्वास्थ्य शिविरमा उहाँको शरीरको सामान्य परीक्षण भएको थियो । शरीरमा देखिएका गिर्खा क्यान्सर हुनसक्ने आशङ्का स्वास्थ्यकर्मीले गरेका छन् ।

विद्यालयका शिक्षकले उहाँको उपचारका लागि सहयोगी दाताको खोजी भइरहेको विद्यालयका सहायक प्रधानाध्यापक डिल्लीराज सापकोटा जानकारी दिनुहुन्छ । बाबु मनबहादुर र आमा तीर्थकुमारी ज्याला मजदुरी गर्नुहुन्छ । खानलाउन नपुग्ने भएपछि उहाँहरूले उपचारमा खर्च गर्नसक्ने अवस्था नरहेको उहाँ बताउनुहुन्छ ।

“आमाबाबुले केही गर्न सक्नुहुँदैन, विद्यालय आए पनि शरीर दुख्ने गरेकाले महेन्द्र रूने, कराउने गर्छन्”, सहायक प्रअ सापकोटा भन्नुहुन्छ “सहयोग जुटाएर उपचार गर्न पठाउने योजना छ । दाताको खोजी गरिरहेका छौँ ।” भेटेका सबैलाई महेन्द्रको दुःख सुनाउने गरेको बताउनुहुन्छ ।

“महेन्द्रको घाँटी सुनिएर डरलाग्दो भइसकेको छ । उहाँ खान र अन्य काम गर्नका लागि निहुरिन पनि सक्नुहुन्न । विद्यालय आए पनि पढ्न सक्नुभएको छैन् । समयमा उपचार नगरे उहाँको जीवनमा समस्या आउने देखिन्छ”, सहायक प्रअ सापकोटा भन्नुहुन्छ ।

निसीखोला–६ का वडाध्यक्ष हेमबहादुर बुढा बालकको उपचारका लागि सहयोगी दाता खोजिरहेको बताउनुहुन्छ । “वडाले मात्रै गरेको सहयोगले उपचार खर्च पुग्दैन, आवश्यक सिफारिस गरेर सहयोगीको खोजीमा लागेका छौँ”, उहाँ भन्नुहुन्छ । सामान्य उपचारले नहुने र निरन्तर दुखाइ भइरहेकाले तत्काल उपचारमा जानैपर्नेमा उहाँ जोड दिनुहुन्छ ।

विक दम्पतीले कसरी उपचार गर्ने चिन्ता लागेको बताउनुहुन्छ । मदजुरी बाहेक अन्य काम नभएकाले छोराको उपचारका लागि सहयोगको आग्रह गरिरहेको बाबु मनबहादुर बताउनुहुन्छ ।